فيديو

التعليم بده نفضة

رفعوا شعار "نعم لإصلاح مناهجنا ونظام التعليم" وطالبوا بحرق المناهج القديمة وكتابتها من الصفر حتى تكون ملائمة لعصرنا
3 كانون الثاني 2017
شارك

طلابنا تراجعوا كمان مرة بمؤشرات …. الدراسة العالمية للرياضيات والعلوم

طلعنا سابع أسوأ دولة بالرياضيات! وعلاماتنا... هه… على حفة ال50%.   

أكيد فيها زعل.

ثار الشارع الأردني وثارت القوى الحزبية.  

طلعوا العالم  مظاهرات…. حكوا تليفونات مع الراديو…. بعثوا رسائل للجرائد…. هددوا وهاوشوا.     

رفعوا شعار "نعم لإصلاح مناهجنا ونظام التعليم" وطالبوا بحرق المناهج القديمة وكتابتها من الصفر حتى تكون ملائمة لعصرنا……...

طبعا. هذا حلم.

ما صار اشي من هالحكي.

ولا رح يصير.

لأنه نحن منفزع  للقشرة، واللب…. الله لا يرده.

 

أكيد في ناس رح تسأل: إنتوا برنامج إقتصادي.

لويش بتسولفوا بالتعليم؟

هو الاقتصاد والتعليم بيتفرقوا؟؟

من أهم غايات التعليم تجهيز الناس للشغل ولسوق العمل.

ونحن الحمدالله نظامنا التعليمي بينتج ناس مهارات أساسية ما عندهم.

لغة عربي، إنجليزي، كتابة، كيف تطرح فكرة، مهارات بحث وتطوير الذات…

يا أخي حتى الالتزام بالمواعيد و تنظيم الوقت مش زابطة!!!  لهدرجة!   

اتخيل. ١٢ سنة مدرسة و٤-٥ سنين جامعة والواحد مش عارف يوصل عالوقت أو يبعت إيميل متكتك؟

84٪ من شركات القطاع الصحي يشكو من قلة هاي المهارات،  و70% من شركات الإتصالات بيقولوا نفس الاشي.  وهلما جر على باقي القطاعات.

وهذول ولاد البلد اللي بيشكوا، اللي عارفين "عاداتنا وتقاليدنا".

ما بالك الشركات الأجنبية والمستثمرين الأجانب؟

 

بلاش: آخر ١٥ سنة تشقلبت الدنيا تشقلب من ورا تطورات التكنلوجيا... من أهمهم الانترنت!

يعني اليوم أي معلومة بدك اياها موجوده….  طلبك جاهز مع فيديوا تفصيلي عالبيعة

كيف تعزل بيتك؟ في.

كيف تسقي مزرعتك حتى تخفف استهلاك مي؟ في.

كيف تسوق منتجاتك أون لاين!!! في.

بدهاش غير فضول وشوية اجتهاد شخصي.

فإيش هي المهارات اللي لازم نطورها؟

نتعلم نسأل "كيف" و"ليش"...

نعرف كيف نحلل معلومة جديدة ونربط أفكار ببعض. حتى نبتكر.

بس مناهجنا؟ عملوا العكس!!!  

إحفظ! وما تسأل! وجاوب حرفي!

يعني تلقين.

والنتيجة؟

كله حبر على ورق لأنه البني آدم مش عارف يترجم اللي بالكتب لأرض الواقع.

لأنه مش فاهم!! حافظ!!

 

متذكرين عبارة "العلم نور، والنور كهرباء، والكهرباء خطر والخطر موت، فلما العلم؟"

نكتة بتقولوا… تخويث.  

طيب عبارة "بدنا  نبني اقتصاد معرفي".... كمان نكتة؟

العالم عم يصغر والمنافسة قاعدة بتزيد.  

وسلاحنا الوحيد هو العلم والمعرفة والابتكار.

غير هيك اقتصادنا رح يضل حامله المساعدات الأجنبية والدين.

إصلاح الاقتصادي يعني ضمنيا إصلاح لنظام التعليم.

المناهج بدها نفضة. نقطة.

 

ذات علاقة

فيديو

تأهيل و تدريب المعلمين

اغلب المعلمين لا يعرفون اسس التعليم
26 نيسان 2017
فيديو

المعلم : الحلقة المفقودة

المسؤول عن مستقبل الدولة
17 نيسان 2017
فيديو

لا معايير للمعلم

8 نيسان 2017

روابط خارجية

من مالنا

مقال
12 كانون الثاني 2017
فيديو
10 October 2014
بحث
23 آب 2017
فيديو
1 أيلول 2016